Chalo hum farz kartay hain

Chalo hum farz kartay hain 

wohi batein jo duniya main nahi hoti 

chalo hum farz kartay hain 

kay har suu noor phaila hai 

na din main chaya sunnata 

na raaton main andheira hai 

na suraj shab main sota hai 

na din main chand khota hai 

hai har dil roshni say pur 

aur aankhon main ujalay hain 

chalo hum farz kartay hain 

kay har mosam baharaan hai 

khizaan main phool khiltay hain 

nigahein rang say nahati hain 

gulon ki khushboou'n say 

sab nazaray muattar hain 

parinday chahchahatay hain 

khushi kay geet gatay hain 

chalo hum farz kartay hain 

kay har dil main muhabbat hai 

kaheen jaghray nahi hotay 

na barish dukh ki hoti hai 

na aandhi gham ki chalti hai 

na nafrat phaans banti hai 

hain sabhi chehron pe muskanain 

kaheen jaghray nahi hotay 

chalo hum farz kartay hain 

kay gham khushion say behtar hain 

chalo humfarz kartay hain 

ye duniya tum say behtar hai 

zara tahro.....!!!!!!!! 

magar hum farz kiyun kar lain 

yakeen mujh ko batata hai 

haqeeqat to haqeeqat hai 

main sab kuch jaan sakta hoon 

na suraj shab main chamkay ga 

na din main chand niklay ga 

khizaan main gul nahi khiltay 

yeh nafrat mar nahi sakti 

na gham khushiyon say behtar hain 

na duniya tum say behtar hai 

hai duniya ki haqeeqat kia 

faqat aik tum hi achay ho 

jahano'n say zamano'n say 

maknoon la makano'n say 

yeh sab kuch hai wohi jo 

isi duniya main hota hai 

to phir hum farz kiyun kar lain 

fakat ik tum hi achay ho......