Zaban-e-hind hai urdu to mathe ki shikan kyooN hai

Zaban-e-hind hai urdoo to mathe ki shikan kyooN hai

watan meN be-watan kyooN hai 

meri mazloom urdoo teri saNsoN meN ghuTan kyooN hai

tera lehja mahakata hai to lafzoN meN thakan kyooN hai

agar tu phool hai to phool meN itani chubhan kyooN hai

watan meN be-watan kyooN hai

ye nanak ki ye Khusro ki daya shankar ki boli hai

ye diwali ye baisakhi ye id-ul-fitr holi hai

magar ye dil ki dhaRakan aj kal dil ki jalan kyooN hai

watan meN be-watan kyooN hai

ye nazoN se pali thi meer ke Galib ke aNgan meN

jo sooraj ban ke chamaki thi kabhi mahaloN ke daman meN

wo shahzadi zabanoN ki yahaN beanjuman kyooN hai

watan meN be-watan kyooN hai

muhabbat ka sabhi elan kar jate haiN mehfil meN

ke is ke waste jazba hai hamdardi ka har dil meN

magar haq maNgane ke waqt ye beganapan kyooN hai

watan meN be-watan kyooN hai

ye dosheeza jo bazaroN se iThalati guzarati thi

laboN ki nazuki jis ki gulaboN si bikharati thi

jo tahazeeboN ki sar ki oRhani thi ab kafan kyooN hai

watan meN be-watan kyooN hai

muhabbat ka agar dawa hai to is ko bachao tum

jo wada kal kiya tha aj wo wada nibhao tum

agar tum ram ho to phir ye rawan ka chalan kyooN hai

watan meN be-watan kyooN hai