sab kahaN kuchh lala-o-gul men numayaN ho gain
Khak men kya suraten hongi ki pinhaN ho gain
yad thi hamako bhi ranga rang bazmaraiyaN
lekin ab naqsh-o-nigar-e-taq-e-nisiyaN ho gain
thin banatunnash-e-garduN din ko parde men nihaN
shab ko unake ji men kya ai ki uriyaN ho gain
qaid men yaqub ne li go na yusuf ki Khabar
lekin aNkhen rauzan-e-divar-e-zindaN ho gain
sab raqibon se hon naKhush, par zanan-e-misr se
hai zulaiKha Khush ke mahv-e-mah-e-kanaN ho gain
ju-e-KhuN aNkhon se bahane do ki hai sham-e-firaq
main ye samajhuNga ke shamaen ho farozaN ho gain
in parizadon se lenge Khuld men ham intaqam
qudarat-e-haq se yahi huren agar waN ho gain
nind usaki hai, dimaG usaka hai, raten usaki hain
teri zulfen jisake bazu par parishaN ho gain
main chaman men kya gaya, goya dabistaN khul gaya
bul-bulen sun kar mere nale, GazalKhvaN ho gain
vo nigahen kyuN hui jati hain yarab dil ke par
jo meri kotahi-e-qismat se mizshgaN ho gain
bas ki roka main ne aur sine men ubharen pai ba pai
meri ahen baKhiya-e-chak-e-garibaN ho gain
waN gaya bhi main to unaki galiyon ka kya javab
yad thi jitani duayen, sarf-e-darbaN ho gain
jaNfiza hai bada, jisake hath men jam a gaya
sab lakiren hath ki goya rag-e-jaN ho gain
ham muvahihad hain, hamara kesh hai tark-e-rusum
millaten jab miT gain, ajza-e-imaN ho gain
ranj se Khugar hua insaN to miT jata hai ranj
mushkilen mujh par paDi itani ke asaN ho gain
yuN hi gar rota raha 'Ghalib', to ae ahl-e-jahaN
dekhana in bastiyon ko tum ki viraN ho gain
No comments:
Post a Comment